Голем пожар избувна денеска во магацин за гуми на улицата „Д-р Фрањо Туѓман“ во хрватската општина Света Недела, а густ црн чад се издигнува над градот и е видлив од Загреб и Самобор.
На терен се пожарникарите од Света Недела со повеќе возила и скали, а поради интензитетот на пожарот, им се приклучија и екипи од соседните противпожарни служби. Според локалните медиуми, магацинот се наоѓа во близина на вилата Хото, а целата околина е блокирана поради безбедносни причини.
Засега нема информации за повредени лица, но пожарникарите предупредуваат граѓаните да избегнуваат движење во близина на областа поради можност од вдишување на штетен чад. Причините за пожарот сè уште не се утврдени.
