Коалицијата ВЛЕН излезе со остра реакција по последните настани во Тетово, нарекувајќи ги случувањата „најсериозен политички скандал на овие избори“. Повод е фотографијата која кружи во медиумите, на која се гледа претставникот на АА-АЛТЕРНАТИВА во Тетово, Арди Исмаили, на средба со кандидатката на Левица, Катка Божиновска.
„Тоа е најјасниот доказ дека оваа коалиција е подготвена да ги продаде сите национални вредности само за да дојде до власт“, стои во соопштението на ВЛЕН.
Во реакцијата се потсетува дека Левица е партија која, според ВЛЕН, „јавноста ја препозна по навредите кон Албанците, ставовите против независно Косово, противењето на членството во НАТО и повиците за затворање на џамии и ограничување на правата на Албанците“.
„А денес, АА-АЛТЕРНАТИВА седнува на иста маса со нив за валкан изборен договор. Ова не е политика, ова е пазар на срам. Ова не е стратегија, туку морално потонување,“ додаваат од коалицијата.
ВЛЕН порача дека на 2 ноември, Албанците во Тетово, Дебар, Струга и во сите општини каде се гласа, ќе знаат дека „гласот за АА-АЛТЕРНАТИВА е глас за Левица, за антиалбанство и за политички срам“.
„ВЛЕН со своите кандидати – Биљал Касами во Тетово и Фисник Мела во Дебар – ја претставува вистинската вредност, развој и достоинство. Албанците не се за продажба и не преговараат со оние кои ги навредиле,“ завршува соопштението.
