Кандидатот за градоначалник на Град Скопје и актуелен градоначалник на Општина Кисела Вода, Орце Ѓорѓиевски, денеска имаше средба со спортски легенди од минатото и сегашноста, на која беше разговарано за унапредување на спортот и спортската инфраструктура во главниот град.
Ѓорѓиевски се сретна со фудбалската икона Горан Пандев, автомобилскиот шампион Игор Стефановски – Иџе, претседателот на ФФМ Масар Омерагиќ, поранешниот голман Борко Ристовски и претседателот на Одбојкарската федерација Петар Јовановски. Тој ја нагласи важноста од нивното искуство и визија за иднината на спортот во Македонија.
„Ми беше чест да разговарам со луѓе кои оставија силен белег во спортот и од кои има многу што да се научи. Скопје заслужува нови спортски инфраструктурни проекти, со акцент на пешачките и велосипедските патеки, како начин на живот и здравје за сите нас,“ изјави Ѓорѓиевски.
Тој порача дека заедно со граѓаните ќе се изгради визија за Скопје како спортски центар – град на победници, на млади таленти и на силен спортски дух.
