Апликациите за социјални мрежи, купување и „паметен дом“ собираат многу повеќе информации отколку што претпоставуваме, покажува заедничкото истражување на британскиот потрошувачки портал Which? и фирмата за сајбер‑безбедност Hexiosec.
Во анализата биле опфатени 20 од најпреземаните мобилни апликации – од WhatsApp, Facebook и TikTok, до Amazon, Temu, Ring и Strava – со вкупно 28 милијарди преземања ширум светот. Сите, без исклучок, бараат „ризични дозволи“ — пристап до микрофон, локација, камера или можност да прикажуваат скокачки прозорци над други апликации.
Најагресивни барања
• Xiaomi Home: 91 дозвола, меѓу нив и пристап до микрофон и прецизна локација, а податоците се препраќаат директно на сервери во Кина.
• Samsung SmartThings: 82 дозволи.
• Facebook: 69 дозволи.
• WhatsApp: 66 дозволи.
• Temu: познат по агресивно маркетиншко имејлирање и скокачки пораки.
Што велат разработувачите?
Meta уверува дека не го активира микрофонот без знаење на корисникот, TikTok инсистира дека собира само податоци неопходни за „поддршка на функционалноста“, а Temu и Amazon тврдат дека обработуваат информации во согласност со сите прописи и дека дозволите служат за практични функции, како AR‑преглед на производ или гласовно пребарување.
Поука за корисниците
Уредникот на Which?, Хари Роуз, предупредува: „Апликациите ретко се навистина бесплатни – плаќаме со нашите податоци. Проверете точно на што се согласувате пред да кликнете ‘Allow’.“
