По разорните земјотреси во Венецуела, спасувачките екипи работат под огромен притисок на времето, пребарувајќи ги урнатините во потрага по затрупани лица. Во спасувачките операции се вклучуваат и странски тимови, додека германската Техничка помош (ТХВ) испраќа екипа со обучени кучиња за пребарување.
На врвот од куп урнатини во Каракас, маж со мегафон повикува на тишина – со цел да се слушнат можни повици за помош под рушевините на урната зграда.
На скали, опкружена со прашина и парчиња стакло и камен, седи Каролина Лопез, која го бара својот партнер. Таа е во шок. „Не знам што да правам. Тоа е единственото што можам да го кажам. Му се молам на Бога за сите нас“, изјавува таа.
Најтешко погоден крајбрежниот регион
Два силни земјотреса со јачина од 7,2 и 7,5 степени го погодија северот на Венецуела во средата навечер. Особено тешко е погоден крајбрежниот регион Ла Гваира, во непосредна близина на главниот град Каракас.
Како и многу други жители, Рошер учествува во потрагата по преживеани под урнатините. „Меѓу 22 часот и 3 часот наутро извлековме осум луѓе живи. Особено граѓаните се самоорганизираат, собираат донации и делат храна“, вели тој.
Бројот на жртви се очекува да расте
Венецуелските власти засега пријавуваат најмалку 235 загинати и над 4.300 повредени.
Многумина остануваат без домови, а околу 250 згради се целосно урнати, додека уште стотици се во опасност од уривање.
Погодените жители ја минуваат и втората ноќ на улица или спијат во своите автомобили, бидејќи не е сигурно дали нивните домови се безбедни. Се стравува дека бројот на жртви ќе продолжи да расте.
„Заостануваме зад ситуацијата“
Инес Адарме исто така се обидува да помогне на настраданите, но е разочарана од реакцијата на властите. Таа ја споредува оваа катастрофа со трагедијата од 1999 година, кога по свлечишта загинаа десетици илјади луѓе.
„Во споредба со тогаш, гледам многу помалку спасувачи и безбедносен персонал“, вели таа. Според неа, земјата не била подготвена за ваков земјотрес. „Имам чувство дека заостануваме зад ситуацијата и дека оваа катастрофа не е приоритет.“
Меѓународната помош веќе пристигнува
Вонредната состојба, прогласена од владата, и натаму е на сила. Вршителката на должност претседател, Делси Родригез ги посети погодените подрачја, се обрати до јавноста и побара меѓународна поддршка.
Меѓународната помош веќе започна. Спасувачки тимови со кучиња за трагање се подготвуваат за операција во Венецуела. Од Германија, 50 припадници на ТХВ патуваат кон погодените региони за да бараат преживеани под урнатините.
Германската влада најави испорака на генератори и хуманитарна помош, вклучително и филтри за вода, полски кревети и шатори.
Мексико, кое има искуство со силни земјотреси, испраќа тим од 250 спасувачи и медицински персонал со четири авиони, заедно со пет кучиња за трагање и дрон за поддршка на операциите.
Помош и од САД, предизвици во координацијата
САД најавија итна помош во вредност од 150 милиони долари, вклучително и испраќање спасувачки тимови и медицинска поддршка.
Обединетите нации ги координираат меѓународните спасувачки напори. Сепак, пристигнувањето на помошта е отежнато: меѓународниот аеродром во Каракас и важен морски пристаништен јазол се сериозно оштетени, што ја комплицира логистиката за доставување помош.
Авторка: Џени Барке, АРД
