Царинските службеници на граничниот премин Богородица спречија обид за криумчарење на голема количина цигари, при што беа запленети 5.000 штеки без акцизни маркички, чија проценета вредност изнесува околу девет милиони денари. Во акцијата е приведен возачот на товарното возило, српски државјанин, против кого е поднесена кривична пријава.
Според информациите од Царинската управа, камионот бил пријавен за транзит од Грција кон Србија, а според приложената документација превезувал градежен материјал – камена волна.
При извршената детална контрола, царинските службеници откриле дека над палетите со пријавената стока биле сокриени 100 необележани кутии со по 50 штеки цигари. Вкупно биле пронајдени 5.000 штеки цигари без акцизни маркички, кои не биле пријавени во царинската документација.
Возачот на камионот е лишен од слобода, а против него до Основното јавно обвинителство во Гевгелија е поднесена кривична пријава поради сомнение за сторено кривично дело „криумчарење“.
Од Царинската управа истакнуваат дека со оваа акција уште еднаш ја потврдуваат својата определба за сузбивање на нелегалната трговија со тутунски производи и за спречување на прекуграничниот криминал.
