Претседателот на Србија Александар Вучиќ тврди дека косовскиот премиер Албин Курти на средба во Париз со францускиот претседател ќе изнесе две барања, а според него, едното е „многу опасно“.
Тој тврди дека Курти ќе побара НАТО да се повлече од копнената безбедносна зона на северот од Косово, а со тоа, како што рече, Приштина би можела да ги внесе Косовските безбедносни сили таму.
„Се надевам дека никој во НАТО нема да помисли да поддржи такво барање, сигурен сум дека Макрон нема да го направи тоа. Тоа би бил директен напад врз мирот“, рече Вучиќ.
Вториот услов, како што изјави претседателот на Србија, се однесува на притисок врз Србија да не смее да го користи своето оружје против Албанците.
Тој изнесе и тврдење за формирање воен сојуз меѓу Приштина, Тирана и Загреб, за кој рече дека е насочен против Србија.
Вучиќ најави и технолошки проекти, а очекува првите роботи произведени во Србија до Видовден. Најави и летечки автомобили за изложбата Експо 2027 во Белград.
