Седми пат по ред, во срцето на Прилеп – кај Градскиот Саат, оваа сабота (13.09.), со почеток од 10часот ќе се одржи Фестивалот на млекото.
Оваа година во фокусот ги ставаме сточарите и производителите на млеко и млечни производи – луѓето кои со години, со посветеност и љубов, се грижат за стадата и ја негуваат традицијата на производство.
Нивната работа е тешка, често незабележана, а предизвиците се секојдневни – од климатските промени и недостиг на пасишта, до економската неизвесност и напорот да се одржи квалитетот во услови на сè помали ресурси. Но токму тие луѓе се носители на живата традиција.
Тие го чуваат вистинскиот вкус на млекото и сирењето, и преку својата работа ни овозможуваат да се потсетиме на богатството што го има нашата земја.
Фестивалот оваа година е посветен на нивниот глас – за сите да слушнеме какви се предизвиците на сточарите денес, и што можеме заедно да направиме за да се зачува и развива оваа важна гранка.
Оваа година со нас ќе бидат и Слоу Фуд Млади, кои вечерта на Камената бина, заедно со шеф Маре Јаневска од Алијансата на готвачи, ќе подготват Диско Супа – вкусно јадење направено од производи кои вообичаено би завршиле во корпите за отпадоци, но сега ќе добијат нов живот во форма на креативна и вкусна супа. На овој начин, младите ќе испратат важна порака за одржливост, намалување на отпадот и вреднување на храната.
На фестивалот ќе можете да:
се запознаете со производителите и нивните приказни
дегустирате и купите автентични сирења и млечни производи
учествувате во дебати и дискусии за иднината на сточарството
уживате во музика, дружење и богата фестивалска атмосфера
13 септември 2025
Прилеп, Градскиот Саат и Камената бина
Фестивалот на млекото е место каде што традицијата, младите и иднината на локалното сточарство се спојуваат во едно.
Добредојдовте и да го прославиме млекото, сирењето и трудот на нашите сточари!
