ВМРО-ДПМНЕ излезе со остра реакција во која упати серија тешки обвинувања кон поранешни обвинители поврзани со некогашното Специјално јавно обвинителство, меѓу кои се споменуваат и Ленче Ристоска, Гаврил Бубевски и Лиле Стефанова.
Од партијата наведуваат дека обвинителите во изминатата деценија не постапувале во интерес на правдата, туку, како што велат, биле дел од систем кој ја нарушил правната сигурност во државата. Според нив, пред да реагираат на најавите за одземање на предмети, поранешните обвинители треба да се соочат со сопствената одговорност.
Во реакцијата, ВМРО-ДПМНЕ поставува и директни прашања, доведувајќи ја во прашање работата на СЈО и начинот на кој се воделе истрагите. Тие прашуваат дали обвинителите треба кривично да одговараат за, како што наведуваат, злоупотреба на јавни средства и политички прогон.
Дополнително, се повикуваат на изјави и сведочења поврзани со наводни влијанија од поранешни високи функционери врз изборот на предмети во СЈО, алудирајќи на политичка мотивираност во работата на обвинителството.
Во контекст на целата реакција, партијата потсетува и на случајот со поранешната специјална обвинителка Катица Јанева, оценувајќи дека тоа е пример за, како што велат, „политички инструиран систем кој ја закопал правдата“.
На крајот, ВМРО-ДПМНЕ заклучува дека дел од обвинителите, меѓу кои и Ленче Ристоска, биле дел од истиот апарат кој, според нив, ја поткопувал правдата, и порачуваат дека јавноста има право да добие одговори за нивната улога во изминатите години.
