Тим кој го предводи турскиот експерт Бајрам Вардар започна со изработка на развоен мастер-план за општина Чаир. Проектот е инициран од кандидатот за градоначалник на Општина Чаир и актуелен министер за животна средина, Изет Меџити, и има за цел да обезбеди иновативен и одржлив урбанистички развој за оваа општина .
Во групата експерти се наоѓаат реномирани имиња од областа на архитектурата и урбанизмот. Меѓу нив е Надир Доган, урбанист, дипломиран на Универзитетот „Гази“, основач на ND İMAR A. Ş. Тој е автор на просторни планови за метрополи како Истанбул, Бурса, Кожаели и Трабзон, како и многу крупни проекти за урбана трансформација .
Друг значаен член на тимот е д-р Мустафа Тутар, архитект по образование од Техничкиот универзитет во Истанбул, со магистерска титула од Универзитетот во Мисури, САД, и докторат во областа на урбанизмот. Тој е основач на компанијата „Saydam Tasarım“ и има реализирано повеќе од 800 меѓународни проекти во архитектонскиот дизајн и визуализација .
Проектот најавува современ и визионерски пристап кон уредувањето и развојот на општина Чаир, преку искуството и креативниот потенцијал на тимот составен од турски и меѓународно признати експерти.
