Тригодишно момче, кое беше тешко повредено откако заврши во просторот со крокодили во зоолошка градина во англиската грофовија Кембриџшир, повеќе не е во критична состојба, соопшти локалната полиција.
Детето веднаш по инцидентот, кој се случил во четвртокот во зоолошката градина „Johnsons of Old Hurst“ во близина на Хантингдон, било пренесено во болницата „Addenbrooke’s“ во Кембриџ. Полицијата потврди за медиумите дека малишанот сè уште е хоспитализиран, но неговата здравствена состојба сега е стабилна.
Според првичните и застрашувачки информации од истрагата, детето било нападнато од најмалку еден крокодил, откако претходно, под засега неразјаснети околности, наводно било фрлено во заградениот простор со влекачите.
Напаѓачот уапсен, па пуштен со кауција – не бил способен за распит
Поради сомнеж за обид за убиство, полицијата уапсила 30-годишен маж со жителство во Норфолк. Надлежните служби соопштија дека мажот во моментот на апсењето не бил во состојба да биде подложен на полициски распит (што најчесто се должи на специфична физичка или ментална состојба), по што бил пуштен на слобода со кауција до септември, кога процесот треба да продолжи.
Полицијата го примила повикот за помош во 13:24 часот од страна на Итната медицинска помош, која прва пријавила дека детето се здобило со опасни повреди по животот.
„Детето се здобило со сериозни повреди додека се наоѓало во просторот за крокодили, а од таму успеале да го извлечат вработените во зоолошката градина“, се наведува во полициското соопштение. На местото на настанот веднаш му била укажана прва помош, по што итно било транспортирано во болница.
Комплексот работи со уредна лиценца
Зоолошката градина „Johnsons of Old Hurst“ се наоѓа во истоименото село во Кембриџшир и во неа живеат повеќе од 100 животни, вклучувајќи лавови и тигри.
Овој комплекс, кој работи со целосна и уредна лиценца, опфаќа и фарма, кафуле и месарница отворени пред 20 години. Специфичниот објект во кој се чуваат крокодилите и каде што се случи незапаметениот инцидент е изграден во 2009 година. Истрагата треба да утврди како точно мажот успеал да го фрли детето преку безбедносните бариери.
