Транспортните здруженија од Западен Балкан бараат итно системско решение за проблемот со возачите на камиони кои работат во Шенген зоната, откако новите правила за контрола на влез и излез од Европската унија предизвикаа сериозни потешкотии во меѓународниот транспорт.
Според здруженијата, строгата примена на правилото за ограничен престој од 90 дена во период од 180 дена за државјани на земји надвор од ЕУ создава проблеми за професионалните возачи кои често и континуирано преминуваат граници во рамки на својата работа. Тие предупредуваат дека ваквата пракса доведува до ризик од забрани за влез, притвори и сериозни нарушувања во логистичките синџири.
Претставниците на транспортниот сектор истакнуваат дека возачите практично се наоѓаат во правна несигурност, бидејќи нивната работа подразбира постојано движење низ земјите од Шенген зоната, што не се вклопува во постојните правила за краткорочен престој. Според нив, тоа создава директен притисок врз компаниите, но и врз економијата на целиот регион.
Од индустријата се бара или воведување на посебен статус за професионални возачи, или создавање на специјални визи и дозволи кои ќе овозможат непречено извршување на транспортните активности без ризик од прекршување на правилата за престој.
Транспортните здруженија предупредуваат дека доколку не се најде решение, може да дојде до дополнителни блокади на границите и нарушување на снабдувањето меѓу Западен Балкан и Европската унија, што би имало директни економски последици за двете страни.
