Американскиот претседател Доналд Трамп го критикуваше британскиот премиер Кир Стармер за неговата улога во американските напади врз Иран, велејќи дека тој не бил од помош и дека односите меѓу двете земји очигледно не се онакви какви што беа порано.
Во интервју за британскиот весник „Сан“, Трамп изрази разочарување од ставот на Обединетото Кралство, објавува весникот.
Трамп во телефонско интервју рече дека никогаш не помислил дека ќе го доживее ова, особено не од Обединетото Кралство. Споредувајќи ги сојузниците, тој додаде дека Франција е одлична, како и другите, додека Обединетото Кралство е многу различно.
Критиките на Трамп дојдоа откако владата на Стармер првично им го одби на Соединетите Држави правото на користење на британските бази за напад врз Иран, а потоа ги отвори за, како што рече, одбранбени напади. Стармер во понеделникот во Долниот дом нагласи дека владата не верува во промена на режимот од воздух, осврнувајќи се на нападите.
