Поранешниот припадник на ОВК Фадил Пушколи синоќа бил приведен на граничниот премин Блаце, по информација дека Србија издала потерница по него, но по неколкучасовен распит македонската полиција го пуштила на слобода. Веста за приведувањето и за ослободувањето ја објави самиот Пушколи.
Пушколи првично соопшти дека бил запрен при преминувањето на границата Блаце – Елез Хан врз основа на налог од српските власти.
Тој тврди дека му било кажано оти случајот е поврзан со неговото поранешно членство во Ослободителната војска на Косово и побара косовските институции да се вклучат во заштитата на неговите права.
Засега, сепак, нема јавно достапна официјална информација од македонските институции за кое конкретно кривично дело Србија евентуално го бара Пушколи, ниту е објавена содржината на потерницата. Оттука, не може да се потврди неговото тврдење дека единствената причина за приведувањето било тоа што бил припадник на ОВК.
Неколку часа по првата објава, Пушколи соопшти дека е пуштен.
„По интервју и испрашување, бев ослободен од полицијата“, напиша тој, заблагодарувајќи им се на полициските службеници за, како што рече, коректното и професионално постапување.
Заменик-министерот за внатрешни работи Астрит Исени утрово јавно реагираше на случајот, посочувајќи го односот на полициските службеници кон Пушколи како пример за професионално и достоинствено постапување.
Случајот потсетува на приведувањето на поранешниот припадник на ОВК Блерим Рамадани во Македонија во јули 2024 година. МВР тогаш официјално потврди дека Рамадани бил уапсен на Јажинце врз основа на потерница на Интерпол Србија. Србија го бараше поради сомневања за воени злосторства во регионот на Неродиме.
Рамадани подоцна беше ставен во куќен притвор, а македонскиот суд донесе одлука против негова екстрадиција во Србија. Тој потоа го напушти куќниот притвор, што предизвика дипломатски реакции од Белград.
Приведувањето на Пушколи се случи истиот ден кога хрватските власти го ослободија косовскиот државјанин Бајрам Бајрами, кој претходно беше приведен по меѓународна потерница на Србија поради сомневања за воени злосторства. Косовското Министерство за правда тогаш соопшти дека интервенирало кај хрватските власти и ја оспорувало надлежноста на Србија за случајот.
Во случајот на Пушколи, засега нема информација дека е поведена постапка за екстрадиција. Фактот што бил пуштен неколку часа по приведувањето покажува дека случајот, барем во оваа фаза, не ја следи постапката што беше применета за Рамадани во 2024 година.
