Министерот за меѓународна развојна соработка и надворешна трговија, Бенџамин Дуса, изјави дека земјите кои ќе останат без шведска развојна поддршка се Зимбабве, Танзанија, Мозамбик, Либерија и Боливија. Тој нагласи дека средствата се ограничени и дека мора да се пренаменат таму каде што Шведска оценила дека има најголема стратешка потреба.
Според плановите, Шведска ќе ја зголеми финансиската поддршка за Украина на најмалку 10 милијарди круни (околу 910 милиони евра) во 2026 година. Владата проценува дека пренамената на средствата ќе ослободи повеќе од две милијарди круни во наредните две години, кои би се вложиле во проекти како обновата на украинската енергетска инфраструктура.
Шведска веќе укинала развојна помош за повеќе од десет земји откако актуелната влада ја презеде власта во 2022 година, меѓу кои и Буркина Фасо и Мали. Иако земјата важи за еден од најголемите донатори на хуманитарна помош со годишен буџет од околу 56 милијарди круни, владата најави растечка пренамена на средствата.
Меѓу најавените мерки е и укинување на 53 милијарди круни годишно во периодот од 2026 до 2028 година, со фокус на внатрешни расходи, вклучително и покривање на трошоците за имиграција и враќање мигранти.
Со најновата одлука, Стокхолм јасно сигнализира дека поддршката за Украина останува врвен приоритет, дури и по цена на ограничување на помошта за дел од земјите во Африка и Латинска Америка.
