Шпанија е подготвена да работи на создавање заедничка армија на Европската Унија „веќе утре“, бидејќи само тогаш „средните сили“ на Европа можат да добијат безбедносно и одбранбено значење во денешниот свет, изјави шпанскиот премиер Педро Санчез.
„Подготвени сме да се движиме кон заедничка европска армија, не за десет или две години, туку веднаш. Веќе утре, ако можам да го кажам тоа олоквијално“, рече тој во Барселона на форумот „Европски пулс“ посветен на иднината на Европа.
Санчез истакна дека создавањето заеднички сили не е прашање на избор, туку неопходност поради војните во Украина и на Блискиот Исток. Според него, ЕУ е составена од „просечни сили“ кои можат да бидат влијателни само доколку настапуваат заеднички.
– Подготвени сме да напредуваме кон заедничка европска војска веднаш, за да не дозволиме други да ја користат нашата ранливост – порача Санчез.
Шпанскиот премиер го изнесе овој став во време на кревко примирје меѓу САД и Иран и израелските напади врз Либан. Мадрид претходно го одби барањето на американскиот претседател Доналд Трамп за зголемување на воените трошоци на пет отсто од БДП и го затвори својот воздушен простор за авиони кои би учествувале во напади врз Иран, заштитувајќи ја и зоната околу Ормуската Теснина од дополнителна ескалација. Поради овие одлуки, Трамп во март ѝ се закани на Шпанија со трговски санкции.
