Претседателот на Белорусија, Александар Лукашенко, денес ги предупреди западните соседи и Украина да не преземаат агресија против неговата земја, изјавувајќи дека Минск не сака војна, но дека ќе се брани со сите расположливи средства.
„Мојата задача е да ги предупредам моите соседи: Естонија, Латвија, Литванија, Полска, можеби до одреден степен и Украина. Не дај Боже да извршат агресија против Белорусија. Ние не сакаме војна и немаме намера да војуваме со нив“, рече Лукашенко во интервју за RT.
Тој нагласи дека не се можни воени операции против Полска и Литванија од територијата на Белорусија, освен ако земјата не биде вовлечена во конфликтот и принудена да одговори. Во исто време, белорускиот претседател истакна дека земјата ќе возврати во случај на напад.
„Ова не значи дека веднаш ќе употребиме нуклеарно оружје доколку дојде до конфликт. Имаме доволно други средства да му се спротивставиме“, рече тој. Лукашенко додаде дека, во случај на закана за опстанокот на државата, Русија исто така ќе застане во одбрана на Белорусија, во согласност со меѓудржавниот договор.
„Ако видиме дека опстанокот на Белорусија е загрозен, не само ние, туку и во согласност со нашиот договор со Руската Федерација, воопшто нема да им биде лесно. Ќе употребиме сè што имаме“, рече Лукашенко.
Зборувајќи за иднината на НАТО во контекст на политиката на претседателот на Соединетите Американски Држави, Доналд Трамп, Лукашенко оцени дека дури и ако Трамп одлучи да ја укине Алијансата, нема да има доволно време да го спроведе.
„Други луѓе ќе дојдат да го спасат НАТО. А Трамп и неговите соработници разбираат дека НАТО не е само боеви глави и пари на Соединетите Американски Држави, туку огромна геополитичка поддршка на САД заедно со нејзините сојузници на Евроазискиот континент“, заклучи Лукашенко.
