Коалицијата ВЛЕН остро реагира на обидите на ДУИ да политизира инцидент кој се случи во Липково, при што беше повреден активистот и носител на листата на НАИ, Зеќирија Шаини.
„Особено загрижува што политичките опоненти, предводени од ДУИ, се обидоа да ѝ дадат политичка димензија на оваа трагедија, грубо манипулирајќи со семеен конфликт во сред изборна кампања. Но случајот се покажа како семеен проблем и нема никаква врска со политиката,“ се наведува во соопштението.
Според ВЛЕН, обидот на ДУИ да ја искористи ситуацијата за сопствена политичка корист пропадна, откако самиот активист, Зеќирија Шаини, јавно потврди дека нема политичко непријателство со никого. „ДУИ сакаше да се претстави како херој во туѓи сметки – но тоа не помина,“ посочуваат од коалицијата.
ВЛЕН ја обвинува партијата дека, со помош на дел од медиумите, повторно создава политички театар и манипулира со јавноста, користејќи ја ситуацијата за прикривање на падот на довербата и губењето на електоратот.
„Јасно стоиме на ставот дека безбедноста на граѓаните е одговорност на институциите, а не тема за кампања,“ се додава во соопштението.
