Реализацијата на мерката за доделување ваучери за инвертер клима уреди за ранливите категории граѓани се одвива со засилено темпо, при што веќе повеќе од половина од доделените ваучери се подигнати.
Станува збор за државна мерка насочена кон намалување на енергетската сиромаштија и подобрување на енергетската ефикасност во домаќинствата, преку обезбедување поддршка за набавка и вградување на високоефикасни инвертер клима уреди.
Според информациите, граѓаните кои се на списокот имаат рок од 30 дена да ги подигнат ваучерите во центрите за социјална работа, а потоа истите можат да ги искористат за купување и инсталација на клима уред.
Вредноста на ваучерите достигнува до околу 28.000 денари, а уредите треба да бидат со најмалку енергетска класа А+ и соодветна моќност, што ќе овозможи пониски трошоци за греење и ладење на домаќинствата.
Мерката е дел од поширока програма на државата за поддршка на ранливите потрошувачи на енергија, со цел да се подобрат условите за живот и да се намалат сметките за електрична енергија, особено во услови на зголемени енергетски трошоци.
Од надлежните институции оценуваат дека интересот за мерката е висок, а досегашната динамика на подигнување на ваучерите покажува дека процесот се спроведува ефикасно и во согласност со предвидените рокови.
Дистрибуцијата на ваучерите продолжува и во наредниот период, при што се очекува целосна реализација на мерката пред почетокот на следната грејна сезона.
