Арсенал е новиот шампион на Англија. Во натпреварот од 37-то коло од Премиер лигата, Манчестер Сити ремизираше 1:1 на гости кај Борнмут и со тоа остана на 78 бода, четири помалку од Арсенал пред последното коло од Премиер-лигата.
На тимот на Пеп Гвардиола му беше потребна победа во овој натпревар за да остане во трката за титулата.
Тренерот на Манчестер Сити, Пеп Гвардиола, на спортски начин го призна поразот од Арсенал, честитајќи им на противниците за заслужената победа. Во својата изјава по натпреварот, тој го истакна заморот на својот тим поради густиот распоред, но исто така ги пофали своите играчи за борбата до самиот крај.
„Беше тежок натпревар, знаевме дека доаѓа. Тие имаа време да се подготват и ја зачуваа својата енергија, додека ние игравме на секои три дена и бевме многу исцрпени“, започна Гвардиола.
„Првото полувреме беше добро, создадовме неколку шанси, но постигнавме гол предоцна. Се случи, што се случи, тоа се случи. Немавме свежина во нозете. Се обидовме да ги контролираме работите со многу играчи од средниот ред, но тие се навистина, навистина добри“, продолжи тој со својата анализа.
„Моите играчи даваа сè од себе цела сезона, се бореа до самиот крај и бевме блиску. Честитки до Арсенал, до Микел и сите нивни играчи и навивачи, ја заслужија победата. Сигурен сум дека ова е посебно чувство за него и големо задоволство. Вложија многу труд и работа и им честитам за тоа“, рече менаџерот на Сити.
Текстот продолжува под рекламата
За иднината во клубот
Кога беше прашан за неговата иднина, Гвардиола нагласи дека ќе донесе одлука откако ќе разговара со раководството на клубот. „Можам да ви кажам дека имам уште една година од мојот договор. Имавме многу години победи. Но, првата личност со која треба да разговараме е претседателот“, рече тој.
„Кога ќе заврши сезоната, ќе разговараме и ќе донесеме одлука. Јас сум најсреќниот човек на светот што сум во овој клуб. Ова е извонредно“, заклучи Гвардиола.
