Многу мало небесно тело, далеку во ледениот надворешен дел на Сончевиот систем, мистериозно развило атмосфера. Засега нема јасно објаснување како е тоа можно. Според една хипотеза, атмосферата можеби е создадена преку криовулканизам – процес на „ледени вулкани“. Друга теорија сугерира дека е резултат на релативно скорешен удар, бидејќи толку тенка атмосфера би исчезнала во вселената во рок од околу илјада години.
Објектот е означен како (612533) 2002 XV93 и претставува транснептунски објект, што значи дека се наоѓа во Кајперовиот појас, зад орбитата на Нептун. Поточно, станува збор за „плутино“, што значи дека е во орбитална резонанца 2:3 со Нептун – за секои две орбити околу Сонцето, Нептун прави три.
Овој објект е значително помал од Плутон, со дијаметар од околу 500 километри, додека Плутон има околу 2377 километри. Плутон, за разлика од него, може да задржи тенка атмосфера позната како егзосфера кога се наоѓа поблиску до Сонцето, а има и замрзнати гасови како азот, метан и јаглерод моноксид.
Неочекувано откритие
Научниците од Јапонија, заедно со професионални и аматерски астрономи, користеле телескопи од опсерваторијата Кисо при Универзитет во Токио, како и помали аматерски инструменти, за да го набљудуваат објектот. Сепак, никој не очекувал да открие атмосфера.
Откриената егзосфера е исклучително тенка со површински притисок од само 100 до 200 нанобари, што е милиони пати послабо од атмосферата на Земјата. За споредба, Плутон има околу 10 милибари.
Засега не е познато од што точно е составена атмосферата. Се претпоставува дека може да содржи азот, метан и јаглерод моноксид, но набљудувањата од вселенскиот телескоп James Webb Space Telescope не покажале јасни докази за ледови што би ја создавале таа атмосфера.
Следниот чекор е да се утврди составот на егзосферата, што би помогнало да се објасни нејзиното потекло. Ако нејзината густина се намалува со време, најверојатно е резултат на удар. Ако остане стабилна, тоа би значело дека атмосферата се обновува преку испуштање гасови од внатрешноста на телото.
