Со изложувањето на Пчињското евангелие, најстариот ракопис кој го поседува охридската библиотека, оваа институција го отвори патот да биде дел од културниот туризам на градот. Ракописот од крајот на шеснаесеттиот век е непроценливо национално богатство, поради што се очекува туроператорите и туристичките агенции да го вклучат во својата понуда.
„Тоа ќе биде многу интересно за туристите, за странските посетители, но исто така и за граѓаните на Република Македонија. Во него се вметнати специфични букви кои се украсени, по тоа е специфично евангелието. Исто така неговата големина, кожниот превез и самата намена за која се користело“, изјави Христина Трпеска – директорка на НУ „Григор Прличев“.
Покрај со овој значаен експонат посетителите ќе можат да се запознаат и со богатиот фонд на литература во Охрид.
„Исто така имаме фонд кој исто така е стар, од илјада осумстотини седумдесет и втора година датира. Значи околу две илјади книги кои исто така се заштитени како национално богатство на државата, но имаме и странски книги. Имаме италијанско катче, германско катче, полско катче, имаме доста српски книги. Значи богат фонд кој вреди да се посети“, изјави Христина Трпеска – директорка на НУ „Григор Прличев“.
Во тек е подготовка на каталог на македонски, германски, англиски и француски јазик., а се снима и видео за што подобра промоција на богатството што го поседува библиотеката.
