Овогодишниот MacBook Air пристигнува на пазарот со повисока почетна цена, но носи нов M5 SoC и повеќе меморија во основната конфигурација.
Apple официјално го претстави новиот MacBook Air за 2026 година, кој носи M5 SoC, побрзо складирање и надградена безжична поврзаност.
Имено, новиот модел на MacBook Air започнува од 1.099 долари, додека претходната генерација со M4 SoC стартуваше од 999 долари. Сепак, Apple ја удвои основната меморија од 256 GB на 512 GB. Вреди да се напомене и дека максималниот капацитет на интерната меморија сега за првпат достигнува 4 TB, што е двојно повеќе во споредба со минатогодишниот Air. Опциите за RAM меморија остануваат 16, 24 и 32 GB.
Во срцето на овој лаптоп се наоѓа Apple-овиот M5 SoC, кој носи побрз CPU и GPU од новата генерација, како и Neural Accelerator во секое јадро. Apple истакнува дека новиот MacBook Air може без проблем да се справи со барачки креативни задачи, но и со посложени AI процеси. Преминот кон новата генерација носи и надградба на безжичната поврзаност – WiFi 7 го заменува WiFi 6E, додека Bluetooth 6 доаѓа наместо верзијата 5.3. Тука е и Apple-овиот N1 безжичен чип за постабилна и побрза комуникација.
Кога станува збор за дизајнот и останатите спецификации, тие во голема мера остануваат непроменети. Корисниците од новиот Air можат да очекуваат тенко и лесно алуминиумско куќиште, 13 или 15-инчен Liquid Retina дисплеј, 12-мегапикселна Center Stage камера, до 18 часа автономија, како и два USB-C Thunderbolt 4 порти со поддршка за поврзување до два надворешни екрани.
Новите модели на MacBook Air ќе бидат достапни за купување од 11 март.
