Фото: Euro-Office
Група европски технолошки компании најавија јавно лансирање на проектот Euro-Office на 9 јуни. Ова софтверско решение е развиено како суверена европска алтернатива на платформите како Microsoft Office и Google Docs, со цел да се намали зависноста од американски технологии во екот на сè поголемата загриженост за приватноста на податоците.
Иницијативата е поддржана од повеќе организации од индустријата, меѓу кои се вбројуваат IONOS, Nextcloud, Tuta, XWiki и OpenProject.
За разлика од традиционалните канцелариски пакети, Euro-Office не е самостојна апликација. Станува збор за веб-базиран уредувач кој директно се интегрира во постоечките производи на партнерските компании, како што се системи за споделување датотеки или платформи за менаџирање проекти.
Корисниците ќе можат во реално време да прегледуваат и уредуваат текстуални документи, табели и презентации. Системот поддржува широк спектар на формати, вклучувајќи ги DOCX, PPTX, XLSX, PDF, како и стандардите ODF.
Следните приоритети на развојниот тим опфаќаат креирање десктоп и мобилни апликации, како и продлабочена интеграција со отворените стандарди.
Основата на Euro-Office е изградена врз кодот на OnlyOffice, кој е софтвер со отворен код. Креаторите на новиот проект објаснуваат дека одлуката за креирање сопствена верзија е донесена поради неможноста за отворена соработка со оригиналниот развивач. Како главни причини за ваквиот потег се наведуваат недостатокот на транспарентност при развојот, затворањето на одредени функционалности во мобилните апликации и поврзаноста на OnlyOffice со Русија, што создава предизвици за корисниците кои бараат софтвер без потенцијално надворешно влијание.
Од друга страна, компанијата зад OnlyOffice ги отфрла овие тврдења, посочувајќи дека е регистрирана во Латвија и дека нејзиниот руски сегмент од бизнисот бил продаден уште во 2019 година. Оригиналниот развивач го обвини тимот на Euro-Office за прекршување на софтверската лиценца и правилата за интелектуална сопственост. Според нив, за користење на кодот неопходно е да се задржи брендирањето и соодветно да се наведе потеклото на оригиналната технологија.
Интересно е како за развојот на овој проект, кој се промовира со европски вредности, започнува со искористување на туѓ код без дозвола, без разлика што се работи за отворен код.
Исто така, честите тврдења од Европа за тргање од американскиот софтвер, кон повеќе приватен европски софтвер, не се секогаш баш точни.
Извор: https://smartportal.mk
