Бројот на загинати во страшниот верижен судир на бугарски автопат се искачи на 12, откако 50-годишен маж им подлегна на тешките повреди во болница. Бројот на жртвите од тешкиот верижен судир на автопатот „Тракија“ во Бугарија достигна 12, откако 50-годишен маж почина во болница во Сливен. По несреќата – која се случи во услови на густа магла во близина на Јамбол – тој беше примен на одделот за интензивна нега во критична состојба.
Мажот бил примен во болница на 10 ноември, веднаш по несреќата, а лекарите со денови се бореле за неговиот живот. И покрај напорите на медицинскиот персонал, тој им подлегнал на повредите, јавуваат бугарските медиуми „Novinite.bg“ и „bTV“.
Тешката сообраќајна несреќа се случи на 10 ноември, околу 07:00 часот наутро, на автопатот „Тракија“ кај клучката „Зимница“, во близина на Јамбол. Поради густата магла и исклучително слабата видливост, дошло до два одделни верижни судири на двете страни од автопатот, во кои учествувале вкупно 86 возила.
Единаесет лица ги загубија животите на самото место, додека повеќе од 50 патници беа повредени и пренесени во болници низ регионот. Со смртта на 50-годишниот маж, бројот на загинати се искачи на 12.
Во истрагата се вклучени повеќе од 100 сведоци.
Надлежните органи започнаа две одделни прелиминарни истраги за да ги утврдат сите околности околу оваа трагедија и да го реконструираат редоследот на настаните во двата верижни судири.
Истражителите ќе испитаат повеќе од 100 сведоци, а наредени се и над 50 судско-медицински вештачења. Се очекува резултатите од нив да помогнат во утврдувањето на природата и сериозноста на повредите, како и причините за смртта на жртвите. Истрагата, исто така, ќе ги испита постапките на возачите вклучени во несреќата, вклучително и брзините со кои се движеле во услови на густа магла и намалена видливост.
