Денес во Босна и Херцеговина се одржуваат десеттите општи избори, со нешто повеќе од 3,4 милиони гласачи со право на глас. Се избираат органи на власта на државно, ентитетско и кантонално ниво. Избирачките места во БиХ се затворија во 19 часот, освен таму каде што гласањето започна со задоцнување поради технички проблеми.
Според најновите податоци објавени од „Дневни аваз“, излезноста на гласачите до 15:00 часот изнесувала 26,88 отсто. Податоците од Централната изборна комисија (ЦИК) покажуваат дека до тоа време гласале 916.269 гласачи.
Излезноста на гласачите надвор од Босна и Херцеговина изнесувала 1,11 отсто. Што се однесува до поединечните градови и места, највисока излезност досега е забележана во Мостар (66,96 отсто), по што следат Калиновик (51,83 отсто), Источни Стари Град (50,37 отсто), Трново (46,99 отсто), Хан Пиесак (46,46 отсто) и Рогатица (44,72 отсто).
Најнизок процент на излезност до 15:00 часот е забележан во Добретиќи (11,09 отсто), по што следат Оштра Лука, Домаљевац, Јајце, Оџак, Рудо и Бихаќ. Пријавени се бројни проблеми на многу избирачки места поради новиот систем за електронско гласање.
Денес на општи избори на сите нивоа на власт во Босна и Херцеговина се избираат нови органи на власта на државно, ентитетско и кантонално ниво. Граѓаните избираат 518 претставници од повеќе од 7.000 кандидати кои претставуваат 75 политички партии и 29 коалиции. Се гласа за тројца членови на Претседателството на Босна и Херцеговина (по еден од српскиот, хрватскиот и бошњачкиот народ), за членови на Претставничкиот дом на Парламентарното собрание на Босна и Херцеговина, за претседател и двајца потпретседатели на Република Српска, за членови на Народното собрание на Република Српска, за членови на Претставничкиот дом на Парламентот на Федерацијата Босна и Херцеговина и за членови на собранијата на десетте кантони во Федерацијата.
Новина на овие избори е електронското гласање. Воведени се биометриска идентификација на гласачите преку отпечаток од прст и скенирање на гласачките ливчиња на избирачките места.
