Новиот Update Orchestration Platform API донесува централизирано управување со сите ажурирања во Windows 11 системот и апликациите, вклучувајќи ги и програмите кои не се од Microsoft Store.
Microsoft тестира нова функција наречена Update Orchestration Platform (UOP), чија цел е еднаш засекогаш да ја реши хаотичната ситуација во која моментално се наоѓа Windows 11 кога станува збор за ажурирање апликации. Наместо повеќе различни механизми — Windows Update за безбедносни поправки, Microsoft Store за апликации од продавницата, како и бројни интерни „updater-и“ што ги користи секоја трета програма — Windows 11 во иднина би можел да преземе целосна контрола над сите ажурирања.
Screenshot
Според достапните информации, UOP би му овозможил на системот автоматски да скенира, презема и инсталира ажурирања во зависност од тоа како корисникот ги користи одредените апликации.
Windows 11 добива централизирана платформа за ажурирање
Особено важна новина е што дури и програмите кои не се достапни во Microsoft Store, како и драјверите од други производители, ќе можат да ја користат оваа платформа доколку бидат интегрирани со UOP API.
Во тест верзиите на оперативниот систем се појави нова страница „App updates“ во делот „Settings > Apps“, каде ќе бидат видливи сите апликации што го користат UOP. Тоа значи дека Windows ќе може централизирано да презема и инсталира ажурирања дури и за програми што корисникот рачно ги презел од интернет, а сè ќе биде обединето во едно мени.
UOP е опционална функција, па останува на производителите на софтвер да се регистрираат како „update provider“ и да му обезбедат на Windows извршна датотека за скенирање на достапните верзии. Потоа Windows периодично ќе го стартува тој скенер и автоматски ќе управува со ажурирањата.
Овој пристап претставува најголема реорганизација на Windows апликацискиот екосистем во последниве неколку години и би можел драстично да го подобри корисничкото искуство, особено за оние што користат голем број апликации надвор од Microsoft Store.
