Ѕвездата на Интер Мајами, Лионел Меси, проговори за едно од своите најголеми жалења – што не научил англиски како млад човек. Капитенот на Аргентина и освојувач на Светското првенство во 2022 година призна дека се чувствувал како „неук“ кога се среќавал со познати луѓе за време на неговата импресивна кариера, бидејќи не можел да комуницира со нив, објави ESPN.
„Жалам за многу работи“, изјави 38-годишниот Меси за мексиканскиот подкаст „Miro de Atras“. „Жалам што не научив англиски како момче. Имав време да го направам тоа, но не научив. Длабоко жалам“, изјави Меси и додаде:
„Имаше ситуации кога се најдов со неверојатни и спектакуларни луѓе со кои можев да разговарам, а се чувствував како неук човек“. Секогаш си мислев: „Каков идиот сум, какво губење време“.
„Кога си млад, не го разбираш тоа. Денес им кажувам на моите деца за важноста на доброто образование, да учат и да бидат подготвени. Секогаш им велам на моите деца да ги искористат можностите што ги имаат. Нивната ситуација е различна од мојата, иако никогаш ништо не ми недостигаше…“
Меси пристигна во Барселона од родниот Росарио на 13-годишна возраст. „Мојата последна година од школувањето во Аргентина беше катастрофа. Го завршив средното училиште во Барселона, заедно со другите деца од Ла Масија, младинската академија на Барселона“.
Меси, кој се приклучи на Интер Мајами во летото 2023 година по две години во ПСЖ, вели дека фудбалот го научил на други вредни лекции.
„Успеав да постигнам сè и да го достигнам самиот врв на фудбалот, но по патот стекнав многу искуство и научив многу лекции. Фудбалот е навистина начин на живот. Ве учи на многу работи и всадува многу вредности. Воспоставувате доживотни врски и запознавате нови места“, заврши осумкратниот освојувач на „Златната топка“ на Франс фудбал.
