Собранието го усвои новиот Закон за енергетска ефикасност, со кој се поставуваат темели за систематски пристап кон намалување на потрошувачката на енергија, заштита на животната средина и приближување до европските стандарди во оваа област.
Законот содржи јасни правила и обврски за:
- Обновување на јавни и станбени згради со цел да станат поефикасни и поекономични;
- Воведување на енергетски менаџмент во јавниот сектор;
- Финансиски инструменти и фондови за поддршка на домаќинствата и компаниите во инвестиции во енергетска ефикасност;
- Поттикнување на зелени технологии и користење на современи изолациски материјали и системи за греење и ладење.
Со примената на законот, се очекува:
- Намалување на сметките за електрична енергија и греење за граѓаните и фирмите;
- Подобрување на квалитетот на воздухот, преку поефикасно искористување на енергенсите и намалување на емисиите;
- Зголемување на конкурентноста на македонската економија преку усогласување со европските директиви и стандарди;
- Јакнење на енергетската независност, со намалување на увозот и поефикасно користење на домашните ресурси.
Министерството за енергетика, рударство и минерални суровини (МЕРМС) истакнува дека ова е клучен чекор во процесот на усогласување со ЕУ директивите во енергетиката и во борбата против климатските промени. Со законот, Македонија испраќа порака дека е подготвена за сериозни реформи и за одржлив енергетски развој.
По стапувањето во сила на законот, институциите ќе изготват подзаконски акти и правилници, а ќе бидат воспоставени и механизми за мониторинг и контрола на неговата примена.
