Градоначалникот на Чаир, Изет Меџити, денеска на меѓународната конференција „Чаир 2026“ испрати силна порака за улогата на жените во политиката и општеството, нагласувајќи дека без нивно активно учество, развојот на секое општество останува ограничен и едностран.
Во своето обраќање, Меџити истакна дека со години политичките процеси и донесувањето одлуки се граделе без доволно вклучување на женската перспектива, што, според него, директно влијаело врз квалитетот на политиките и развојот на заедницата. Тој нагласи дека времето на маргинализација завршува и дека денес жените не само што бараат простор, туку активно го создаваат, преземајќи лидерски улоги и носејќи одговорност во сите сфери на јавниот и општествениот живот.
Меџити потенцираше дека веќе не е доволно да се зборува само за еднаквост, туку дека институциите имаат обврска да создадат конкретни механизми кои ќе обезбедат фер застапеност, еднакви можности и вистинска поддршка за жените кои сакаат да бидат дел од процесите на одлучување.
„Општество кое не инвестира во потенцијалот и лидерството на жените, всушност го ограничува сопствениот развој“, порача Меџити, додавајќи дека ваквите конференции се важна платформа за отворање на дијалог и за поставување на нови стандарди во политичкото учество на жените.
Тој се заблагодари за можноста да биде дел од конференцијата и ја оцени дискусијата како значаен чекор кон поинклузивно и порамноправно општество.
