Новоизбраниот градоначалник на Чаир Изет Меџити, во интервју за телевизијата Алсат-М изјави дека опозициската ДУИ бара изговори за поразот на локалните избори, и во Чаир и во другите општини.
Во однос на тврдењата дека победил со поддршка од ВМРО-ДПМНЕ, Меџити истакна дека тоа е манипулативен обид за оправдување на поразот:
„Нема ништо невообичаено – погледнете ја Харачината, каде 100 проценти од населението е албанско. Каде е тука улогата на ВМРО? Исто е и со Дижон, каде македонското гласачко тело е минимално. Дури и кај советниците, ВМРО има само еден од 27“, изјави Меџити.
Тој посочи дека додека Левица отворено повикувала на поддршка за кандидатите на ДУИ, ВЛЕН ја добил довербата на граѓаните без условувања и договори зад кулисите. „Овие избори се јасна порака – времето на монопол и клиентелизам завршува“, додаде тој.
Во врска со средбите со Орце Ѓорѓиевски од ВМРО-ДПМНЕ и Максим Димитриевски од ЗНАМ, Меџити објасни дека постои принципиелна соработка каде ВЛЕН не е во директна изборна трка со овие партии.
„Имаме заедничка цел – да ја стабилизираме ситуацијата во Скопје, да ја надминеме кризата со долговите и да воведеме ред во јавните претпријатија. ВЛЕН ќе има своја улога и таму, со конкретна одговорност“, нагласи тој.
Според Меџити, Министерството за екологија ќе ѝ припадне на ЛД (Лига Демократике), додека ВЛЕН останува целосно обединет тим без поделби меѓу коалициските партнери. Тој потврди дека засега не се водат сериозни разговори за реконструкција на Владата.
Тој истакна дека следниот чекор е трансформација на коалицијата во единствена политичка партија. „Време е ВЛЕН да стане една партија. Не бегам од одговорноста, но тоа зависи од волјата на мнозинството“, рече Меџити.
Во однос на иднината на ДУИ, Меџити беше јасен:
„Како што кажав и во кампањата, по изборите ќе почне распаѓањето на ДУИ. Ќе бегаат од предвремени избори како ѓаволот од крст, затоа што се најголеми губитници. Ќе останат само со неколку рурални општини. ВЛЕН е апсолутен победник каде и да се натпреварувавме со нив.“
Меџити додаде дека е горд што ВЛЕН придонел и во општини каде што немале свој кандидат, како Чашка, каде за првпат е избран градоначалник Албанец – симбол на ново време на соработка и интеграција.
Со ова, ВЛЕН се позиционира како доминантна политичка сила меѓу Албанците во Македонија, испраќајќи порака дека ерата на еднопартиска контрола завршува, а започнува нова фаза на партнерства и одговорно владеење.
