Изет Меџити, кој во првиот круг од локалните избори го победи Бујар Османи во Чаир, вечерва во гостување на ТВ 21 изјави дека Националната алијанса за интеграција (НАИ) ќе биде распуштена и дека се очекуваат структурни промени на политичката сцена.
Меџити изјави дека во редовите на НАИ постоело очекување дека ќе го задржат мнозинството од гласачкото тело по заминувањето на Арбен Таравари од Вреди, но дека резултатите од изборите ги разубедиле.
„Да, почна процесот, бидејќи не го очекував овој резултат во НАИ. Особено со заминувањето на Таравари пред шест месеци, тие мислеа дека имаат 90 отсто од гласачкото тело. Но, се покажа дека членството остана во Вреди. Тоа го докажа и овој резултат. Сега во НАИ не се чувствува само изборен пораз, туку и загуба на надеж. Очекувам НАИ да се распушти и да има нови движења“, изјави Меџити.
Тој додаде дека дел од гласачите кои досега биле дел од НАИ веќе започнале комуникации за приклучување кон Вреди, а најави и можни реформи во структурата на движењето.
