Неверојатна лотариска приказна ја потресе Велика Британија, откако жена која можеби освоила џекпот од 12 милиони фунти останала без своето ливче, кое по грешка било фрлено во отпад.
Кат Мејн (46), секретарка во рагби клуб од Аберсинон во Јужен Велс, сега се наоѓа во неизвесност и чека одлука од операторот на лотаријата „Алвин“ за да дознае дали навистина е сопственичка на огромната награда.
Жената вели дека последните месеци се исполнети со голем стрес бидејќи, иако постојат докази дека ливчето можеби е нејзино, правилата за изгубени тикети бараат дополнителна проверка пред исплатата.
Доколку операторот донесе одлука во нејзина корист, парите нема да ѝ бидат исплатени веднаш. Според правилата, во случај на изгубено ливче, добитникот мора да помине низ посебна процедура, а исплатата би можела да се реализира најрано на 3 декември.
Мејн ги уплаќала истите шест броеви цели 20 години – 8, 10, 26, 30, 35 и 42. Броевите за неа и нејзиниот сопруг Маркус имаат посебно значење бидејќи се поврзани со важни датуми од нивниот живот.
Сè започнало кога таа го однела ливчето во продавницата „Лондис“ во Аберсинон за да провери дали е добитно. Таму ѝ било кажано дека нема добивка, па тикетот бил фрлен како недобитен.
Но, подоцна се појавиле сомнежи дека можеби станува збор за грешка. Проблемот бил што отпадот од продавницата веќе бил собран и ливчето не можело повторно да биде пронајдено.
Мејн потоа доставила доказ за купување до „Алвин“, како и снимка од видео надзор на која се гледа моментот кога ливчето било проверувано.
Можно е проблемот да бил во апаратот за проверка
Сопственикот на продавницата, Каран Кумар, изјавил дека постои можност уредот за проверка на лотариските добивки да имал дефект.
Тој додал дека продавницата во моментот нема сопствен систем за видео надзор бидејќи е во процес на реновирање, но нагласил дека би било неверојатно доколку истрагата покаже дека Мејн навистина го имала добитното ливче.
По случајот, продажбата на лото тикети во продавницата била прекината, а лотарискиот терминал бил исклучен додека трае проверката.
Од „Алвин“ потврдиле дека истрагата е во тек и објасниле дека тие се меѓу ретките големи лотариски оператори кои дозволуваат играчите да побараат исплата и кога добитниот тикет е изгубен, украден или уништен.
Конечната одлука дали милионскиот џекпот навистина ѝ припаѓа на Кат Мејн се очекува по завршувањето на проверките, кои според најавите треба да бидат завршени во рок од 30 дена.
