Продолжениот викенд завршува, а илјадници туристи кои престојуваа во Грција масовно се враќаат кон Македонија, предизвикувајќи сериозен метеж и долги колони на граничните премини.
Според сведоштва на патници објавени на социјалните мрежи, најкритична е состојбата на преминот Евзони/Богородица, каде чекањето достигнува и до три часа. Колоните возила се протегаат со километри, а сообраќајот се движи исклучително бавно.
Дополнителен фактор што го забавува протокот е примената на новиот европски систем за влез и излез (EES), кој вклучува биометриска регистрација и подетални проверки на патниците, што создава дополнителни задржувања.
Гужви се регистрирани и на граничниот премин Дојран, каде чекањето е околу еден час. Таму, покрај македонските туристи, во голем број се враќаат и српски патници кои традиционално ја користат оваа рута.
Метеж има и на граничниот премин Блаце, каде според патници се создаваат долги колони во двата правци, а времето на чекање е значително подолго од вообичаеното.
