Европската комисија донесе прелиминарна одлука дека компанијата „Мета“ го прекршила Актот за дигитални услуги (DSA) преку свесното креирање на дизајни кои предизвикуваат зависност кај корисниците на Инстаграм и Фејсбук. Истрагата, која беше отворена уште во мај 2024 година, се фокусира на неколку клучни функции: бесконечното скролање (infinite scroll), автоматското пуштање видеа (autoplay), постојаните нотификации (push notifications) и високо персонализираните алгоритми за препорака на содржини. Според европските регулатори, овие алатки ги ставаат корисниците во режим на „автопилот“ и поттикнуваат компулсивно користење на апликациите.
Комисијата утврди дека „Мета“ потфрлила во проценката на ризиците што нејзините платформи ги имаат врз физичката и менталната благосостојба на луѓето, особено на малолетниците и ранливите групи граѓани. Истражителите открија дека технолошкиот гигант целосно ги игнорирал податоците за тоа колку време тинејџерите поминуваат на социјалните мрежи во текот на ноќта, како и фактот дека форматите како „reels“ и „stories“ се оптимизирани на начин што создава прекумерна зависност. Дополнително, сегашните заштитни мерки на платформите беа оценети како неефикасни – алатките за управување со времето лесно се игнорирани од младите, додека родителската контрола е премногу комплицирана и бара преголема техничка експертиза за да има вистински ефект.
Поради ова, Брисел бара од „Мета“ да направи структурни промени во самиот дизајн на двете платформи. Тоа подразбира целосно исклучување на автоматското пуштање видеа и бесконечното скролање по автоматизам (by default), воведување ефективни паузи за време на користењето на екранот и прилагодување на алгоритмите за препораки за тие да не бидат насочени исклучиво кон вештачко задржување на вниманието.
Оваа одлука сè уште не е конечна и „Мета“ има право на писмен одговор. Сепак, доколку наодите се потврдат, компанијата се соочува со огромна казна која може да достигне до 6 проценти од нејзиниот вкупен глобален годишен промет. Врз основа на приходите на компанијата од минатата година, оваа казна би изнесувала повеќе од 12 милијарди долари (околу 11 милијарди евра). Ова е само последен во низата чекори на ЕУ против големите технолошки гиганти, по претходните високи казни изречени против социјалната мрежа Х на Илон Маск и кинеската платформа за е-трговија Тему.
