Ново меѓународно истражување предупредува на сериозен пораст на неплодноста кај жените постари од 35 години. Според анализата, во светот моментално има околу 53,6 милиони жени на возраст од 35 до 49 години кои не можат да забременат, а експертите очекуваат оваа бројка дополнително да расте во наредните години.
Истражувањето, спроведено од научници од Медицинскиот универзитет во Чонгкинг, ги анализирало здравствените податоци од 204 земји во периодот од 1990 до 2023 година. Резултатите, објавени во научното списание The Lancet Obstetrics, Gynecology & Women’s Health, покажуваат дека стапката на неплодност постојано се зголемува.
Најголем пораст е забележан кај жените на возраст од 35 до 39 години, што според истражувачите е поврзано со сè почестото одложување на мајчинството поради образование, кариера и економски причини.
Неплодноста е дефинирана како неможност да се постигне клиничка бременост по 12 месеци редовни незаштитени сексуални односи.
Експертите потсетуваат дека плодноста природно почнува да опаѓа уште од средината на триесеттите години, поради намалување на бројот и квалитетот на јајце-клетките, а до крајот на четириесеттите шансите за природно зачнување се значително помали.
Покрај возраста, научниците како дополнителни фактори ги посочуваат стресот, дебелината, современиот начин на живот и одложувањето на родителството.
Според прогнозите, доколку сегашниот тренд продолжи, до 2036 година бројот на жени погодени од неплодност би можел да достигне 79,6 милиони.
Истражувачите нагласуваат дека неплодноста не е само медицински проблем, туку има и психолошки, социјални и економски последици, поради што повикуваат на подобра превенција, порано откривање на проблемите и поширок пристап до услуги за репродуктивно здравје.
