Климатските промени и прекумерната градежна експанзија сериозно ја загрозуваат иднината на Малдивите, а експертите предупредуваат дека околу 80 проценти од земјата може да стане неподобна за живот во следните 50 години. Додека властите го ставаат економскиот развој пред заштитата на животната средина, младите активисти на островите не се предаваат. Преку протести, чистење на пластичен отпад и едукација, новата генерација бара итна заштита на нивниот дом и крај за уништувањето на гребените.
Борбата за зачувување на островите сè почесто се преселува на самиот океан. Група млади луѓе неодамна организираше протест со кајаци против насипувањето на морето, процес со кој се уништуваат заштитените мочуришни подрачја во резерватот на УНЕСКО.
За заштита на екосистемот се формираат и нови невладини организации. Една од нив е иницијативата „Проект ТимаВеши“ (Project ThimaaVeshi), што во превод значи „јас и опкружувањето“. Нивниот фокус е ставен на справување со ерозијата на брегот, пластичното загадување и штетите што ги нанесува градежниот сектор. Во градот Аду на југот од земјата, младите ги документираат сите градежни зафати кои ги загрозуваат коралите, додека во главниот град Мале водат кампањи против отпадот.
Во акциите се вклучуваат и локалните сурфери. Заедно ги вадат оставените рибарски мрежи од коралните гребени, собираат илјадници пластични шишиња и ги учи младите генерации дека имаат право на здрава животна средина.
Создавањето на овие движења често започнува од обични секојдневни ситуации. Иницијативата во Аду тргнала како собиранка на средношколци, за денес да прерасне во официјално регистрирана организација. Слична е приказната и со групата „Рипл“ (Ripple) од Мале, која настанала додека група пријатели играле видеоигри.
Откако забележале дека нивните омилени места за собиранки се затрупани со ѓубре, почнале да снимаат видеа од чистењето за социјалната мрежа ТикТок. Видеата станаа популарни, па групата денес организира неделни акции за чистење и рециклирање.
Друга организација, „Барнаклс“ (Barnacles), е фокусирана на климатското образование. Нејзините основачи истакнуваат дека постојаните вести за климатската калодомија создаваат чувство на немоќ кај нивните врстници, па затоа преку акција се обидуваат да ја вратат надежта.
Борбата на младите соочува со оспорувања. Владини претставници и критичари често ја поврзуваат нивната возраст со наивност, тврдејќи дека акција за чистење плажа нема да го реши глобалното затоплување. Министерот за климатски промени, Али Шариф, на еден јавен форум дури изјави дека младите имаат „премногу емоции“ и дека одлуките треба да им се препуштат на поискусните.
Активистите одговараат дека се свесни за лимитите на нивните можности, но одбиваат да седат со скрстени раце додека нивниот дом исчезнува. Нивната цел е да изградат генерација која ќе ги знае своите права и ќе спречи целосно уништување на природното наследство.
