Данска планира да го укине највисокиот данок на книги во светот во обид да ги охрабри луѓето да читаат повеќе.
Данокот на книги во Данска е 25 проценти, а владата верува дека таквата политика придонесува за растечка „криза на читање“.
Министерот за култура Јакоб Енгел-Шмит објави дека владата ќе предложи во својот буџетски план да се укине данокот на книги, што ќе ја чини земјата 330 милиони дански круни (44 милиони евра) годишно, објавува „Гардијан“.
Енгел-Шмит рече дека верува оти мора да се преземат ризици за да се стави крај на кризата со читањето што се шири во последниве години.
„Неверојатно сум горд. Не се случува секој ден некој да успева да ги убеди колегите дека толку огромни пари треба да се инвестираат во потрошувачката и културата на Данците“, рече министерот.
Другите нордиски земји исто така имаат стандардна даночна стапка од 25 проценти, но не ја применуваат за книги. Во Финска, ДДВ за книги е 14 проценти, во Шведска е шест проценти, а во Норвешка не се наплаќа.
Извор: tv21
