И без пари и без решение оставени земјоделците од беровско Дворише, компирот бадијала им скапува во визбите, оти откуп нема. Се снаоѓаат како знаат и умеат, го носат по пазарите во другите градови, ама продаваат едвај 200 килограми. Ванчо Пеновски разочаран од таму вели во визбите имаат и по 30 тона компир, кој не знаат што да му прават.
,,Се скапува, немаме откуп, не бива, а нашиот компир си стои не може да се продаде. Има и по 20,30 тона стои компир, но не само на мене, на многу луѓе овде. Некој само ако се снашол оди на пазар, еве во Струмица на пазарот. Ништо, еве ниту субвенции ни пуштија, нема никакви информации, така компирот си скапува, еве јас како да просперирам? Човек нема со што да земе губре и останатите материјали.“, вели Пеновски
Дополнителен проблем за земјоделците од овде е тоа што немаат исплатено субвенции, велат тешко дека некој ќе продолжи во вакви услови. Принудени се да се селат и да ги напуштат огништата.
,,Дека да одиме, ниту не вработуваат, ниту ништо. Приморан е човек да напушта и да бега од овде, не бидува, не може да просперираме. Никој нема добиено и субвенции. За 23 та немаме, за 2025 немаме. Имаме сметки за плаќање, деца на школо, а ние не може да опстанеме на тој начин.“, додава Пеновски
Земјоделците од таму велат дека планираат да отидат и до министерството за земјоделство за да разговараат за нивниот проблем. Доколку нема решение и Ванчо, но и сите од таму ќе се откажат со производството на компир и ќе се иселат од нивните огништа.
