Во рамките на 14-тиот Меѓународен форум за енергија за одржлив развој – IFESD-14, денес се одржа панел-сесијата „Digital transformation of energy systems: accelerating action through coordination and innovation“, посветена на интеграцијата на дигиталните технологии во енергетските системи. Настанот ја нагласи поврзаноста меѓу електрификацијата, дигитализацијата и целите за декарбонизација, при што дигиталната трансформација беше претставена како клучен фактор за поефикасна, пофлексибилна и поодржлива енергетска иднина.
Андоновски: Дигитализацијата е новата енергија на управувањето
Министерот за дигитална трансформација Стефан Андоновски, кој го отвори панелот, ја истакна потребата од поголема координација меѓу енергетскиот и ИКТ-секторот.
„Дигитализацијата може да ја забрза нашата заедничка мисија за одржлива енергетска иднина. Таа создава ефикасност, транспарентност и отпорност – секој ват, секој киловат-час и секоја одлука стануваат попаметни, почисти и поинклузивни,“ рече Андоновски.
Тој посочи дека Владата ја третира дигиталната трансформација како хоризонтална реформа, со акцент на енергетиката, каде веќе се воспоставени целосно дигитализиран систем за управување со документи, интегрирано финансиско планирање и повеќе од 20 дигитализирани услуги за граѓани и бизниси.
Меѓународна поддршка и визија за модерни системи
Во воведниот дел зборуваа и Радиа Седаоуи (ESCWA), Денис Мулхоланд (UNECE), Мајкл Вилијамсон (ESCAP) и Армен Григорјан (UNDP), кои ја поставија рамката за дискусија за интероперабилност на системите, управување со децентрализирано производство, складирање на енергија и кибер-отпорност.
Панелот, коорганизиран од Владата на Македонија, UNECE, ESCWA, ESCAP и UNDP, има за цел да идентификува конкретни пилот-иницијативи и партнерства, како и да ја засили меѓусекторската координација во согласност со приоритетите на UN-Energy за дигитализација.
IFESD-14 – платформа за визија и акција
Форумот, организиран од Министерството за енергетика, рударство и минерални суровини во партнерство со УНДП и петте регионални комисии на ООН (UNECE, UNESCAP, UNECLAC, UNECA и UNESCWA), претставува глобална платформа за размена на искуства и решенија за одржливи енергетски системи.
Дискусијата потврди дека дигитализацијата веќе не е опција, туку нужен предуслов за модерна, безбедна и зелена енергетска иднина.
