Нови медицински апарати, опремување на дерматолошка служба, реконструкција на системот за парно греење и подобрување на условите во здравствената установа се дел од активностите што ги реализира Здравствениот дом „Д-р Светозар Чочороски“ во Вевчани, со поддршка од Владата, Фондот за здравствено осигурување (ФЗО) и преку донации.
За првпат, Офталмолошката амбуланта доби нов автоматски кераторефрактометар – компјутерски апарат за брзо, автоматско и прецизно испитување на видот и геометријата на окото. За потребите на офталмолошката служба обезбедена е и лупа од 90 диоптрии, наменета за дијагностицирање заболувања на рожницата и анализа на очниот нерв.
„Ова е уште една потврда дека го подигнуваме квалитетот на офталмолошката грижа за здравјето на очите на нашите пациенти. Прецизна дијагностика, брзи прегледи, поздрави очи, тоа е нашата грижа за секој пациент. Продолжуваме да ја модернизираме опремата за што поквалитетна здравствена услуга за нашите сограѓани“, изјави директорката на Здравствениот дом во Вевчани, Рената Пешиноска.
Здравствениот дом обезбедува и итна медицинска помош за Вевчани, Лабуништа, Подгорци, Октиси, Велешта и други населени места. Според установата, располага со шест редовни тима за итна медицинска помош, со кои покрива околу 25.000 жители.
Меѓу набавената опрема се и дерматоскоп, електрокаутер, криоспреј и медицински инструменти за новата дерматолошка служба, како и ЕКГ-апарати и дефибрилатор.
„Обезбедивме нови ЕКГ-апарати за Здравствениот дом во Вевчани. Потреба од оваа услуга имаат околу 150 пациенти неделно. Со тоа се унапредуваат можностите за навремена и прецизна дијагностика на срцевата функција, овозможувајќи поквалитетна здравствена услуга за нашите пациенти“, вели Пешиноска.
Дополнителна медицинска опрема е обезбедена и преку донации. Меѓу неа се два ултразвучни апарати за РТГ-службата, компјутерски радиографски систем за дигитализација на рендген-апаратите, центрифуга и петдиференцијален крвен бројач со ЦРП за лабораторијата, како и концентратори за кислород.
Од Здравствениот дом велат дека се воведени и ехо-доплер прегледи на каротидните и периферните артерии и вени, како и ултразвучни прегледи на колковите кај бебиња до една година. Обезбеден е и монитор за следење на виталните параметри, со што дополнително се унапредуваат дијагностичките можности на установата. Во тек е постапка за јавна набавка на нов ултразвучен апарат за кардиологија.
Покрај набавката на медицинска опрема, реализирани се и градежни активности за подобрување на условите во објектот. Од установата велат дека целосно е реконструиран системот за парно греење, со што се подобрени неговата ефикасност, стабилност и безбедност. Завршена е и постапката за јавна набавка на услуги за изработка на проект за надградба, реконструкција и ентериерно уредување на поткровјето и покривот на објектот, а проектната документација е во фаза на изработка.
За кадровските капацитети, установата која обезбедува специјалистичко консултативни услуги и за пациенти од Дебар, Ресен, Охрид, Струга, Кичево , Маврово и Ростуше, во моментов има седум специјализанти од различни области, меѓу кои педијатрија, пулмологија и алергологија, интерна медицина, кардиологија, ургентна медицина, гастроентерохепатологија и медицина на трудот.
„Дополнително, по потреба се обезбедуваат и приправни екипи составени од лекар, медицинска сестра и возач. Тријажата на пациентите се врши исклучиво според итноста на состојбата и проценката на тимовите од итната помош, независно од тоа за кое населено место станува збор на територијата што ја покриваме“, велат од Здравствениот дом Вевчани.
