Легендарната хрватска пејачка Тереза Кесовија е хоспитализирана поради срцеви проблеми, а нејзините концерти закажани за 3 и 4 октомври се одложени.
Весникот „Слободна Далмација“ од Сплит пренесува дека, иако Кесовија не е во животно загрозувачка состојба, лекарите одлучиле таа да остане во болница додека нејзината состојба не се стабилизира.
„Таа не е во животно загрозувачка ситуација, но потребно е да се стабилизира. Не заврши во болница само од претпазливост, туку се појавија срцеви проблеми, па е задржана таму заради стабилизација. Да не се појавеше срцевиот проблем, Тереза немаше да биде хоспитализирана“, изјавил за „Слободна Далмација“ извор близок до пејачката.
Веста за одложувањето на концертите претходно беше објавена на веб-страницата на концертната сала „Ватрослав Лисински“, со образложение дека настапите се одложени од здравствени причини. Исто така, беше наведено дека информациите за новите термини за настапите на Кесовија ќе бидат објавени дополнително.
