Пожар избувна попладнево во скопската населба Железара, каде гори магацин за бои и лакови на булевар „Александар Македонски“ бр. 67.
Според информациите од Центарот за управување со кризи (ЦУК), на терен се екипи на Бригадата за противпожарна заштита со шест противпожарни возила и 20 пожарникари.
„Гори објект – магацин за бои и лакови на булевар „Александар Македонски“ бр. 67. Во 17:10 часот на терен се излезени екипи на Бригадата за противпожарна заштита со шест противпожарни возила и 20 пожарникари. Пожарот сè уште се води како активен“, соопшти ЦУК.
Засега нема информации за повредени лица, ниту за причините за избувнувањето на пожарот и материјалната штета.
Поради тоа што станува збор за магацин во кој се складираат бои и лакови, пожарникарите интервенираат со зголемено внимание. Надлежните служби се очекува да информираат повеќе детали по завршувањето на интервенцијата.
