Информацијата дека системот Safe City, кон крајот на месцов ќе стане реалност и во Охрид и Струга, изминативе 24 часа е помеѓу најкоментираните деновиве на Facebook профилот на OhridPress.
Системот досега е воспоставен во Скопје, Куманово и Тетово, а во употреба е пуштен и во рамките на СВР Велес, со што се опфатени Велес, Кавадарци, Неготино и Демир Капија.
Следна полициска управа каде што треба да се имплементира „Безбеден град“ е СВР Охрид. По Охрид, проектот треба да продолжи со СВР Струмица и СВР Штип, додека последна на планираниот распоред е СВР Битола, откри министерот во гостувањето во централниот Дневник на Македонската радио-телевизија.
– Скопје, Куманово и Тетово како СВР веќе се покриени. Го пуштивме во употреба во рамки на СВР Велес, тоа е Кавадарци, Неготино, Демир Капија и Велес. Наредно СВР каде што ќе биде имплементиран е СВР Охрид. Потоа следи СВР Струмица и Штип, и на крајот се надевам дека во рамки на оваа година, или, пак, јануари 2027 година, ќе го имплементираме и на територија на СВР Битола, напомена Тошковски.
