Моќна ерупција на вулканот Синабунг го затресе индонезискиот остров Суматра, при што огромен облак од пепел и чад се издигна на височина од 3.500 метри. Иако засега нема информации за жртви или евакуации, властите ги предупредија жителите и туристите да се држат подалеку од опасната зона околу вулканот.
Патиштата, возилата и зградите во неколку села во Кару погодени од ерупцијата се покриени со сив вулкански пепел. Локалните власти им поделија заштитни маски на жителите.
Службениците го зголемија нивото на предупредување за вулканот на „претпазливост“, второто највисоко ниво на тревога.
Breaking : High alert in North Sumatra, Indonesia, as Mount Sinabung VoLCano erupts, sending a thick ash column 3,500 meters above the summit today pic.twitter.com/EbxLFfuslR— World Updates (@Updatesofwworld) August 31, 2026
„Оваа ерупција се смета за почетна и можно е да има помоќна ерупција“, изјави денес директорката на Геолошката агенција на Индонезија, Лана Сарија.
Агенцијата претходно, кон средината на август, забележа знаци на зголемена активност кај вулканот Синабунг, вклучувајќи десетици земјотреси, по што го прошири препорачаниот радиус во кој активностите за јавноста се ограничени.
Индонезија е архипелаг со повеќе од 280 милиони жители и една од сеизмички најактивните области во светот.
Синабунг е еден од повеќе од 120 активни вулкани во земјата, кој се наоѓа на Тихоокеанскиот „Огнен прстен“ – појас по кој се протегаат бројни вулкани и тектонски расцепи околу Тихиот Океан и кој е познат по честите земјотреси и вулканска активност.
