Градоначалникот на Општина Куманово, Максим Димитриевски, информираше дека активно се работи на реконструкција на музичкото училиште „Панче Пешев“, како и на зголемување на неговата енергетска ефикасност и функционалност.
– Во тек се поставувањето нова енергетско-ефикасна фасада, реконструкцијата на покривниот покривач и поставувањето нови ПВЦ-прозорци во објектот – нагласи Димитриевски.
Тој додаде дека реконструкцијата е дел од проектот „Справување со загадувањето на воздухот“, финансиран од Кралството Шведска и од Општина Куманово, а имплементиран од УНДП, со фокус на подобрување на квалитетот на воздухот и унапредување на енергетската ефикасност.
– Првпат целосно го реконструираме училиштето, од неговата изградба, со што по долг временски период објектот добива целосно нов лик и подобри услови за работа – заклучи кумановскиот градоначалник.
