Корисниците на Gmail ќе останат без неколку досегашни опции, но Гугл најавува и бесплатни алатки со вештачка интелигенција.
Гугл најави значајни промени во популарниот сервис за електронска пошта Gmail. Од јануари 2027 година ќе биде укината поддршката за функцијата „Испрати како“ кога станува збор за адреси од надворешни сервиси.
Оваа опција досега им овозможуваше на корисниците да испраќаат пораки од други потврдени адреси, како оние со домени Јаху или Аутлук, директно преку Gmail. Функцијата ќе биде отстранета и од веб-верзијата и од мобилните апликации.
Гугл истовремено ќе го прекине и поврзувањето на надворешни сметки преку Gmailify и преземањето пораки преку застарениот протокол ПОП. Претходно внесените пораки и автоматските пренасочувања нема да бидат избришани.
Како алтернатива, корисниците ќе треба да ги користат официјалните апликации на своите даватели на електронска пошта или класични програми за електронска пошта на компјутер. Промените не се однесуваат на други адреси во рамките на Gmail и на сметките во Гугл Воркспејс.
Иако дел од функциите се укинуваат, Гугл подготвува и новини. Бесплатните корисници на Gmail ќе добијат пристап до одредени алатки со вештачка интелигенција, меѓу кои и алатка за пишување пораки и функција за автоматско сумирање на долги електронски преписки.
