Нови археолошки откритија од езерото Титикака и Боливија откриваат дека цивилизацијата Тиванаку била високо организирано општество со развиени религиозни обреди и трговски врски многу пред подемот на Инките.
Империјата на Инките долго време се смета за најголемата цивилизација во претколумбовска Америка, но новите археолошки истражувања покажуваат дека пред неа со Андите владеела уште постара и мистериозна култура – Тиванаку.
Археолозите при подводни истражувања кај Островот на Сонцето во езерото Титикака пронашле потонати ритуални дарови, златни украси, керамички садови и остатоци од жртвувани млади лами. Овие откритија укажуваат дека населението на Тиванаку изведувало сложени верски церемонии уште помеѓу 500 и 1100 година.
Научниците сметаат дека предметите не завршиле случајно во езерото, туку биле намерно положувани како дарови за нивните божества. Според истражувачите, ваквите ритуали сведочат за добро организирана држава со силна религиозна и политичка структура.
Минатата година беше откриен и голем храм наречен Паласпата, сместен на рид во Боливија. Истражувачите веруваат дека неговата локација имала стратешко значење, бидејќи се наоѓала на раскрсница на важни трговски патишта што ја поврзувале државата Тиванаку со различни региони на Андите.
Овие откритија дополнително ја менуваат сликата за историјата на Јужна Америка и покажуваат дека Тиванаку била една од најразвиените цивилизации на континентот, неколку века пред подемот на Инките.
