Еден од најдобрите играчи за врска во историјата на фудбалот и еден од најуспешните тренери во историјата на Реал Мадрид, Зинедин Зидан (54), официјално стана нов селектор на француската репрезентација и со тоа го наследи легендарниот Дидие Дешамп.
Неговото претставување во седиштето на Француската фудбалска федерација во Париз предизвика огромен интерес. Толпата пред зградата на федерацијата беше огромна, беа поставени бариери, па дури беше ангажирана и полициска единица од Марсеј, а на прес-конференцијата присуствуваа повеќе од сто новинари.
– Ова е продолжение и, на некој начин, остварување на сонот. Во текот на изминатите пет години, откако престанав со работа, добивав понуди за враќање во клупскиот фудбал. Сите ги одбив заради француската репрезентација, бидејќи тоа беше единственото нешто што сакав да го работам по моето искуство во Реал Мадрид. Ја запознав француската репрезентација уште како момче. Почнав од најмладите категории и поминав низ сите нивоа до сениорскиот тим, што претставува врв. Единственото нешто што ме мотивира е можноста да работам за овој тим и да му помогнам да продолжи да победува. Го чекав овој ден во изминатите пет години – рече Зидан и додаде:
– Во тие пет години не седев со скрстени раце. Гледав повеќе натпревари отколку кога го водев Реал Мадрид. Гледав многу натпревари. Ја следев француската репрезентација и таа има голем потенцијал.
Човекот кој досега во својата тренерска кариера го водеше само Реал Мадрид, со кого освои 11 трофеи за пет години, веќе знае каков стил на игра ќе негува на клупата на Франција.
– Наскоро ќе го видите стилот. Ќе го објаснам на следната прес-конференција. Ме води самата игра. Уште од десетгодишна возраст, она што ме мотивира се играта и постигнувањето голови. Поминав 25 години во Шпанија и знаете што значи тоа. Бев лидер на теренот. Денес сакам да бидам лидер благодарение на моето искуство и она што верувам дека го претставувам како тренер. Сето тоа ќе го видите постепено – рече Зидан.
