Претседателката Гордана Сиљановска-Давкова порача дека силна Европа е Европа која живее во мир, демократија и почитување на принципите и вредностите, пред почетокот на состанокот на Северноатлантскиот совет на ниво на шефови на држави и влади, што се одржува во претседателскиот комплекс „Бештепе“ во Анкара.
Осврнувајќи се на мотото на самитот „Посилна Европа – Посилно НАТО“, Сиљановска-Давкова изјави дека проширена и обединета Европа претставува посилна Европа.
„Мотото ‘Посилна Европа – Посилно НАТО’ според мене значи дека проширена и обединета Европа е посилна Европа. Но, најсилната Европа е Европа која живее во мир и демократија, базирана на принципи и вредности. Тоа е мојата порака“, изјави претседателката.
Во кратката изјава за медиумите таа додаде дека „ни треба повеќе кантијанизам отколку макијавелизам“.
Предвидено е Сиљановска-Давкова да се обрати на состанокот на Северноатлантскиот совет, на кој учествуваат шефовите на држави и влади на 32-те земји членки на НАТО.
Македонската делегација на самитот ја сочинуваат и министерот за одбрана Владо Мисајловски, министерот за надворешни работи и надворешна трговија Тимчо Муцунски, како и началникот на Генералштабот на Армијата, генерал-мајор Сашко Лафчиски.
Дводневниот самит во Анкара ги собра лидерите на сите 32 земји членки на НАТО, кои разговараат за безбедносните предизвици, колективната одбрана и идните приоритети на Алијансата.
